Luuk Kuijpers | Wichter vanne basisschole van Nî-jwieërt declamere

’n Paar waekskes geleje hebbe vae ‘ne opreup gedaon nao de wichter vanne basisschole van Nî-jwieërt um ’n gedicht te declamere.

Gedicht declamere

14 wichter hebbe zich gemeldj en zich vrieët oetgestöktj um ’t gekoze gedicht oette kop te lieëre. Waat zeen vae gruuëts op ze. Ze hebbe haard gewêrktj en ’t rizzeltaat kujje op Nederweert24 gaon bekieke. ’t Ein gedicht és wat langer as ’t ânger, klein wichter klein gedicht, de groeëter ’n langer gedicht. De komendje 14 daag kujje ál daag kieke en loestere nao ’n gedicht. Geneetj d’r van! ’t És de moote waerd.

Luuk Kuijpers Groep 4 De Kerneel Ni-jwieërt

OPPE  KêRMIS

Mien oma hieët mich poen gegaeve
Want heej és wat schoeëns te belaeve
De kêrmis és d’r, komtj allemaol mej
En dan duûzelig waere van ’t gedrej

Mer d’r és mieër, kiek good dien ouge oet
Dae snuikkraom tovertj ‘ne lach op dien snoêt
Waat zal ich ‘s koupe, woeë heb ich zin in?
‘ne kenieëlstaaf of toch mer ‘ne sókkerspin?

Ich weît ’t ouch waal, ’t és neet good vör de tang
En dan kom ich thoês mét plekkerige hang
Mer dae poen mót op, dae és mich geschoonke
En ich dînk aan oma, wi-j eur uigskes bloonke

Noow weît ich ’t zieëker, noow weît ich waat ich pak
‘ne staaf en popcorn, ‘ne groeëte zak
Dae staaf és vör oma, um aan te lekke
Want popcorn blieftj aan eur biêterkes plekke!

Tekst: Susan Janssen, Tegelen

Aanpassing Wieërtlands: Jan Moonen

Mej doon
En mochte d’r nog wichter zeen dî-j now ouch zin kriege um mej te doon, azje in ein waek ’t gedicht oette kop kuntj knalle dan meldj uch mér. Hejje gein gedicht? Vae hebbe d’r zát um oet te keze.