Fenne Hoppner | Wichter vanne basisschole van Nî-jwieërt declamere

’n Paar waekskes geleje hebbe vae ‘ne opreup gedaon nao de wichter vanne basisschole van Nî-jwieërt um ’n gedicht te declamere.

Gedicht declamere

14 wichter hebbe zich gemeldj en zich vrieët oetgestöktj um ’t gekoze gedicht oette kop te lieëre. Waat zeen vae gruuëts op ze. Ze hebbe haard gewêrktj en ’t rizzeltaat kujje op Nederweert24 gaon bekieke. ’t Ein gedicht és wat langer as ’t ânger, klein wichter klein gedicht, de groeëter ’n langer gedicht. De komendje 14 daag kujje ál daag kieke en loestere nao ’n gedicht. Geneetj d’r van! ’t És de moote waerd.

Fenne Hoppner Groep 5 De Kerneel Ni-jwieërt

WîNKELE

Jao, ‘t waas alweer zoeë wiêt
De wînkels moste eur spulle kwiêt
Dan begintj ‘t te kriebele beej oos mam
Dao weît ich ongertösse alles van

Oos pap dae verschutj al van kleur
En raaktj bekans ram oversteur
Dus mot ich mét eur op sjaw
En det vervaeltj al hieël êrg gaw

In edere wînkel dae vae binne gaon
Blieftj ze aan edere rék of plânk staon
Veurdet ze eindelik eur keus heet gemaaktj
Heet ze alles waal tieën kieër aangeraaktj

Mét kleî-jer, beuk en zelfs plestiek roeëze
Verpaktj in buûle of in doeëze
Weurtjer op hoês aan gereeje
Oos mam és dan weer dik tevreje

Mer zeejae mich straks oppe Oranje-mêrrentj staon
Dan és d’r toch dein of dânger mis gegaon
Ofwaal: de kest moste waere leeg gemaaktj
Di-i wore weer aardig vôl geraaktj

Kouptj dan, och minse leef
Mienen hieële kraom leeg, astebleef
Dan doje oos mam e groeët plezeer
Want dan gieët ze de volgendje kieër weer

Tekst: Nelly Heyerjans-Meulen, Ni-jwieërt

Mej doon
En mochte d’r nog wichter zeen dî-j now ouch zin kriege um mej te doon, azje in ein waek ’t gedicht oette kop kuntj knalle dan meldj uch mér. Hejje gein gedicht? Vae hebbe d’r zát um oet te keze.