Xem Hermans | Wichter vanne basisschole van Nî-jwieërt declamere

’n Paar waekskes geleje hebbe vae ‘ne opreup gedaon nao de wichter vanne basisschole van Nî-jwieërt um ’n gedicht te declamere.

Gedicht declamere

14 wichter hebbe zich gemeldj en zich vrieët oetgestöktj um ’t gekoze gedicht oette kop te lieëre. Waat zeen vae gruuëts op ze. Ze hebbe haard gewêrktj en ’t rizzeltaat kujje op Nederweert24 gaon bekieke. ’t Ein gedicht és wat langer as ’t ânger, klein wichter klein gedicht, de groeëter ’n langer gedicht. De komendje 14 daag kujje ál daag kieke en loestere nao ’n gedicht. Geneetj d’r van! ’t És de moote waerd.

Xem Hermans Groep 3 De Schrank Doospel

D’N HAAN

Ich kom kej völ slaop tekort
det es de schoût van beej ós naeve
Ze kochte ‘nen haan vör eur hinne
mân, waat guftj det smêrges e laeve!

Ich vleeg  rechtop in mien bed
as daen  hieër um 5 oor begintj te krejje
Gossiemikke, ’t és um gek van te waere
ich wil mich nog ‘ne kieër umdrejje

Mien ouge schete veur
as ich kiek nao di-j  hinnekoeëj
Mêrge, mêrge dan ésj d’r miene
ouch al hebbe di-j hinne det noeëj

Ich pak de buks van oos opa
en scheet ‘m herstikke overhoup
En zét dan in ’t gezétje
“Vörse hanebille te koup”

Tekst: Lijsbeth Schroijen-Moonen, Ni-jwieërt

Mej doon
En mochte d’r nog wichter zeen dî-j now ouch zin kriege um mej te doon, azje in ein waek ’t gedicht oette kop kuntj knalle dan meldj uch mér. Hejje gein gedicht? Vae hebbe d’r zát um oet te keze.