Thomas Kamp | Wichter vanne basisschole van Nî-jwieërt declamere

’n Paar waekskes geleje hebbe vae ‘ne opreup gedaon nao de wichter vanne basisschole van Nî-jwieërt um ’n gedicht te declamere.

Gedicht declamere

14 wichter hebbe zich gemeldj en zich vrieët oetgestöktj um ’t gekoze gedicht oette kop te lieëre. Waat zeen vae gruuëts op ze. Ze hebbe haard gewêrktj en ’t rizzeltaat kujje op Nederweert24 gaon bekieke. ’t Ein gedicht és wat langer as ’t ânger, klein wichter klein gedicht, de groeëter ’n langer gedicht. De komendje 14 daag kujje ál daag kieke en loestere nao ’n gedicht. Geneetj d’r van! ’t És de moote waerd.

Thomas Kamp Groep 7 De Kerneel Ni-jwieërt

FLITS!

Ich zoot te scherre tösse de zooi
wi-j ich lést oppe zölder waas
Dao vóng ich ’n zwart apparaat
Ich wist écht neet waat dét ’t waas

Ich bekeektj van alle kânte
van opzi-j, van bove en van ónger
En ich zoot mich te bedînke
dit waas vast oeëts ’n wêrreldjwónger

Pap zagt; “dés ‘ne fotocamera”
en hae demonstreerdje;
Zoeë maakdje vae foto’s in oze tiêd
kiêk wi-j dét functioneerdje

“Lach ’s nao ’t veugelke”,  zagt pap
en opéns hae douwdje op ’n knupke
“Flits!”…..ich lachdje van oeër tot oeër
en ich stóng d’r op met mien köpke

Ich keek door ’t gaetje
mer zoog mich zelf nerges trök
De foto móst nog “ontwikkeltj” waere
“over ’n waek esse klaor met ’n bitje gelök”

Waat ’n gedoons zék vör éine selfie
bin toch zeker geine kloon?
Allewiel gieët det völ rapper
Gewoeën; met miene tillefoon!

Tekst: Lijsbeth Schroijen-Moonen 2020

Mej doon
En mochte d’r nog wichter zeen dî-j now ouch zin kriege um mej te doon, azje in ein waek ’t gedicht oette kop kuntj knalle dan meldj uch mér. Hejje gein gedicht? Vae hebbe d’r zát um oet te keze.