Goof Verheijen | Wichter vanne basisschole van Nî-jwieërt declamere

’n Paar waekskes geleje hebbe vae ‘ne opreup gedaon nao de wichter vanne basisschole van Nî-jwieërt um ’n gedicht te declamere.

Gedicht declamere

14 wichter hebbe zich gemeldj en zich vrieët oetgestöktj um ’t gekoze gedicht oette kop te lieëre. Waat zeen vae gruuëts op ze. Ze hebbe haard gewêrktj en ’t rizzeltaat kujje op Nederweert24 gaon bekieke. ’t Ein gedicht és wat langer as ’t ânger, klein wichter klein gedicht, de groeëter ’n langer gedicht. De komendje 14 daag kujje ál daag kieke en loestere nao ’n gedicht. Geneetj d’r van! ’t És de moote waerd.

Tovere

Ich oefen daag in, daag oet
met miene schoeëne toversték
Ich wil alles betovere
mer ’t löktj mich neet zoeë dek

Abracadabra det roop ich dan
en zwiep miene sték in ’t roondj
Ich tover ’n snuikspekskesbad vör oma
want dî-j snuiktj zich daoraan roondj

Simsalabim det roop ich dan
miene toversték dae deut ’t wêrk
Ich tover ’nne  knuffel met oma inne hemel
mer miene toversték és neet zoeë stêrk

Hocus pocus pilates pas
miene toversték maaktj overoore
Ich tover gezoondjheid en gelök
waas ich mér as tovenaar gebore

Ich mót echt nao de toverschool
want  wÎ-j ich ouch zwiep en zwéj
En al mien toverspreuke roop
’t löktj mich nog neet zoeë 1, 2, 3

Tekst: Lijsbeth Schroijen-Moonen